قصة الماعز الجبلي من تراث مصياف

أتذكر يوما عندما كنت صغيرا عندما كان والدي يسمح لنا ان ننام في بيت جدي وبيت عمي الكبير بنفس الوقت في حارة القلعة (حارة العليلقة-العليقة) حيث كان اهل الحارة كل بيت فيها يملك عددا محددا من رؤوس الماعز الجبلي السوري كل بيت حوالي من 5-10 معزايات وكان في كل بيت صيرة(حظيرة صغيرة) لايواء الماعز فيها وكان اهل الحارة وأنا معهم نقوم بالنشاط التالي :

الفيقة بتكون بكير قبيل آذان الفجر والأغلب بتذكر هادا الشي في الشتاء وقت ستي كانت تفيقنا نحنا وولاد عمي وتقلنا يالله قوموا هيي ومرة عمي الكبير أم علي ونقوم بردانين ونحنا ولاد صغار بس متلهفين لنطلع مع المعزايات الصبح بسرعة نقوم من الفرشة الممدودة على الأرض وشي عشر ولاد نايمين على الفرشات على الأرض ونقوم كلنا وبوجهنا للصيرة وبيكونو المعزايات فايقين وعم يصدروا اصوات انو نفهم عليهن عم يقولولنا (((( منشان الله طيلعونا بدنا ننزل على الرعي جعنا طول اللي ما دقنا الدجن (الدجن كلمة قديمة بمعنى أكل أو طعام ) )))))))
وهي صورة بتوضح المنظر لأرض دار عربي بمصياف (بيت جدي) كما تبدو من داخل الصيرة بمعنى متل ما بيشوفو المعزايات من جوا لبرا
.
.
وشي نفتح الباب يطلعوا المعزايات وهون بينحلبوا الحلابة الصباحية
.
وكمان هي صورة متل ما بتبين الصيرة من برا مع باب الخشب القديم
.

.
وبعدها نطلع نحنا قبلهن (للمعزايات) من ارض الدار لبرا للحارة وهون منشوف منظر ولا اروع كل ست بيت من الحارة طالعة من البيت ومطالعة معزاياتها معها وناطرة نسوان الحارة ليكملوا كلهن وهيك بس يجتمعوا الكل بالحارة بتتصدر النسوان قطيع الماعز الكبير كتير واللي صار فوق ال 100 راس اذا مو اكتر ويبلشوا سوالف من عند الصبح (كيفك خيتي أم انور شو كيفو بو انور …. الله يصبحك بالخير مهدية شو طابت سعاد ولا لسا برايي تصبيلها رصاصة والله مبيرح كنة عمتي فاتت لعندهن زليخة طرقتها عين وفورا ام حسين بسرعة لحقتها برصاصة ومشي حالها خديها لعند ام حسين ما بتخسري شي …… ومن هالسوالف القديمة لناس هلق اغلبهن ميتين … الله يرحمهن)
ونحنا الاولاد نلاحق المعزايات وبخاصة السخلات والجدايا (_صغار الماعز المولودات حديثا) والنسوان من قدام والمعزايات مكيفات رايحات على الرعي وهيك لنوصل للقلعة وبعدين لنزلة الباب الشرقي كلها من عند الحارة للباب الشرقي وتحت بيكون في راعي مستنا المعزايات للحارة وللي كان عندهن معزي بمصياف (كانو قلال كتير لانو حارة القلعة اخر حارة ضل عندها معزي ) وهون الراعي يستلم المعزايات ويشرق للرعي فيهن ونحنا هون ولاد الحارة يجمعونا النسوان ويطيلعونا للقلعة وبالاخص لعند المدفع وكنا نطحن بحص وتراب بالزند تبع المدفع واللي شاف المدفع بيعرف عن شو عم احكي
.

.
ولما بدنا كنا نروح من صوب المغارة اللي ساكن فيها حارس القلعة يقال من بيت شمة وبيعرف القلعة شبر شبر ومرة يقال وقع من القعلة على فكيه وطلع عليه اسم ابو حنك وذلك لبروز الحنك في وجهه من الكسر وكانو يخوفونا منو ونحنا صغار منشان ما نقرب على القلعة مع انو هوي كتير حباب بس كنا نخاف منو كتير كتير ونحنا صغار لانو زلمة ختيار كتير كتير وبعد ما نخلص فتلة على القلعة نرجع على بيت جدي وهون بتكون مرة عمي منقاية معزاية نضيفة مو مرضانة و حليباتها كييسات كتير بتحلبها بالليل بعد العودة من المرعى مساء وبتحط الحليبات دون غلي( المعزايي منقاي عن خبرة ) بصينية المنيو واسعة القياس الكبير وبتغطي الحليبات بشاشية وفوقها مقطف عينو ديقة (منخل ) منشان ما يتلوتو
وهي صورة للمنخل
.

.
وبتتركهن بالبراد او برا تحت العنبر (صندوق خشبي لتخزين الحبوب ) اذا كان الجو بارد
وهي صورة للعنبر الخشبي المصفح بشرائح التنك وفي فتحة واضحة وبالعادة في فتحات من تحت بس ما طلعوا منشان الغراض اللي حواليه
.

.
وهالعملية طول الليل بيكون الدهن عم يطفوا للاعلى على السطح الواسع اللي عمليتو الصينية والدهن متل ما منعرف بيجمع رائحة ونكهات الحليب وكما نعلم الماعز الجبلي وقت الرعي بياكل راس النبتة يعني ازكى جزء وخصوصا اذا اكل قطلب وسنديان وبلوط واعشاب جبلية لما بيكون الرعي جبلي يعني تتوضع الزيوت الطيارة الرائعة والنكهات الربانية الخالصة في هذه القشطة او وجه الحليب الغير مغلي لكي لا تضيع هذه النكهة الجبلية الرائعة
هون بتكون العجنة تبعت التنور جاهزة ومنروح مع ستي ومرة عمي الى التنور اللي ببيت جدي التاني بيت عمو للبابا
وهي صورة للتنور اللي عم أحكي عنو بالضبط أو بالأحرى ما تبقة منه
.

.
وهونيك منولع التنور بالحطب وبيسخن ومنبلش نعمل خبز تنور بس طحين حنطة اصلي مو طحين مطاحن الية يعني خبز تنور على الاصلي وهون بيطلع الخبز بيشهي وبينال من ريحة حطب السنديان والقطلب والزيتون وعوادو الصغيرة اللي بتحمي التنور
……………..
وهون نحنا مناخد بسرعة الخبزات سخنات وبسرعة على صينية الحليب الراقدة من الليل والدسم على الوجه وهون كل واحد فينا بيمسك رغيف ومنزلو بالصينية بحيث يطبق عليها وهون كل الدسم بيعلق على الرغيف وشيل الرغيف وبلش كوول أطيب أكلة في التاريخ المصييتي الا وهي المغطوطة خبز تنور سختن على وجه حليب ماعز جبلي فيه اطيب المنكهات وهيك كل واحد بيحط رغيفو وبياخد جزء من الدسم واكيد اول رغيف هوي بينبسط اكتر لهيك كنا نتقاتل لهيك كانت ستي تقسم الرغيف الاول بيناتنا والكل ينبسط بهالمغطوطة ونضل ناكل لنشبع لانو منكون عاملين اكتر من صينية حسب العدد