عود المطيط (النقيفة) من تراث مصياف
فبراير 14th, 2010 بواسطة علي سمعول
عود المطيط أو النقيفة
هو عبارة عن قطعة من الخشب وبالأحرى غصن شجرة متفرع إلى قسمين بزاوية حادة فيأخذ شكل رقم 7 أو اشارة النصر أو بشكل حرف Y
وتختلف أحجامه ولكن ليس بالكثير ويفضل أن يكون قطر الغصن الرئيسي من 1.5 إلى 2.5 سم وذلك لأحكام القبضة عليه بشكل جيد أما قطر الفرعين فيفضل أن لا يتجاوز ال 1 سم وذلك لسهولة رؤية الهدف ولسهولة ربط المطيط عليه وعدم الخطأ في التعيين
.
وله انواع متعارفة عليها بين الناس
عود المطيط الشمسي وهوي عود المطيط اللي بتكون الزاوية فيه حادة ومستقيمة أي بشكل رقم 7 تماما دون انحناء في مكان الزاوية
عود المطيط القمري وهو المفضل للي بيحبو يصيدو لأن العييان (التعيين والتسديد ) كتير دقيق ومريح بالإستخدام وبيتميز أنو الزاوية شبه مدورة يعني عن بعيد بيبن متل الهلال شكلو وهوي متل ما قلت المفضل
وكمان في عود مطيط حديد البعض بيصنعو عند الحداد بس مانو كتير مرغوب لأنو مسكو صعب ومو مريح أثناء الصيد وكمان العييان فيه مو كتير دقيق
.
يصنع عود المطيط من أشجار متنوعة
مثلا الزيتون مرغوب جدا لصنع عواد المطيط وهوي كان السائد بين عواد المطيط الموجودة بين الناس
السنديان كتير مرغوب بس قليل اللي بيكون معو سنديان ولأن قليل تلاقي بالشجرة غصن خرج عود سنديان واللي بيلاقي فبكون معلم وعود المطيط تبعو كل مصياف بتحكي فيه( طبعا بين الأولاد )
الصفصاف مو مرغوب أبدا ويندر وجود عود مطيط منو لأنو خشبو بينكسر وما بيتحمل بس اللي بيعملو منو منشان سهولة القص والتشكيل
.
بعد ما نقص غصن زيتون مناسب لصنع العود منشكل العود من المنطقة المناسبة وبمقص تقليم أو بلطة منشكل الأطوال المناسبة للفرعين وللمسكة وبعدين منقشر اللحاء وإما منحطو بالشمس والأغلب على النار بيتنشف شوي شوي
بيتعرض العود لعمليات صقل في حال وجود بعض البروزات المزعجة وتظبيط شكلو قدر الإمكان
بعد هالمرحلة إما منجيب منركب المطيط أو البعض من الطرف العلوي للفرعين بيعمل حلقة على شكل حز بعرض 0.5-1 سم منشان يتوضع المطيط بهالمكان وما يتزحزح وهي مفضلة بس بدها عود الفرعين فيه سماك شوي لأن بدك تاكل شوي من الخشب لتصير هالشغلة
.
.
بعد التشكيل النهائي منركب المطيط وهوي
إما شمبرير موتور من عند شي كومجي مستعمل قديم منقص الشمبري قطع بطول 20-30 ويفضل 25 وبعرض 1-2 سم والعرض بيحددو قدرة الولد على الشد والمط لان كل ما كان القطر كبير بدو قوة أكبر منجيب قطعتين مناسبات ومتناسقات وما فيهن تشققات لأن بعض الشمبريرات بتكون متشققة وبتبين هالشغلات عالمط والشد
أو أحيانا وهاد طبعا صار مع التطور التاريخي لعود المطيط وتطورت صناعة المطيط كانت مكتبة الخلف تجيب مطيط أصلي أبيض مربع الشكل بس طويل (مطيط طبيعي مو تبع التدكدك) وكنا نجيب الجوز ب 5 ل س وهالشي كان كارثة وغالي بالنسبة للطفل لأن خرجيتو كانت ليرة او ليرتين بس اللي بدو يعمل عود مطيط مرتب لازم يجيب هالمطيط الأصلي فكانت مكتبة الخلف حلم كل طفل بس اذا جاب الواحد من هالمطيط بيحط بكل فرع جوز مطيط اي قطعتين منشان القوة والمتانة والشد يكون كتير ممتاز
.
هلق هون بيكون الولد مارر على شي اسكافي ( مصلح أحذية ) بيعرفو أو بيو بيعرفو فبيجيب من عندو قطعة جلد صغيرة وإما جلد صناعي أو طبيعي ونيالو اللي بيقدر يجيب أو حظو بيكون إنو عند الاسكافي قطعة جلد طبيعي لأنو قوي وبيتحمل ومن هالقطعة بيقصها على شكل مستطيل بطول 4-6 سم وبيشيل الزوايا ليصير الشكل اهليلجي وبيثقب طرفي القطعة ثقب صغير منشان يفوت جوز المطيط فيهن ويثبت القطعتين الطوال وبيربط المطيطات بالجلدة بشريط باطون ربط تبع الصوب وقت منركب الصوبة بالشتوية وبعدين بيركب المطيطات على العود في المكان المخصص لهما سابقا أو في طرفي العود وبيشد مظبوط المطيطة وهوي عم يركبها على العود منشان وقت يربطها بشريط الباطون ويتركها ترجع فالشد بيخلي المطيطة تتثبت أكتر على العود
وكمان بالاول وقبل التطور التاريخي كان بدال قطعة الجلد قطعة شمبرير تركتور لانو اسمك من شمبرير الموتور وللعلم هالقطعة الجلدية هيي اللي بتنحط فيها البحصة (الحجرة الصغيرة) اللي رح تكون الطلقة او القذيفة لعود المطيط
.
.
الصورة بتوضح طريقة المسك لعود المطيط طبعا العيان بهالحالة أو السدادة والشعيرة هوي الفرع اليساري يعني لو مسكت العود بايدك اليسار فالعيان او التسديد بيكون على الفرع اليساري والعكس صحيح
.
بس كان عود المطيط المثالي هوي
خشب سنديان أو زيتون
مطيط أبيض خام من عند الخلف
جلد بقري طبيعي من عند شي اسكافي وكان أبو حسن الدرزي هوي الممول الأول لهالقطع للأولاد الصغار بمصياف
.
وبعد ما يتجهز عود المطيط بتبلش رحلات الصيد الجماعية او الفردية بالكروم لصيد الدوري والسمن والشحرور
وبعرف ناس وولاد كانو على مهارة عالية جدا جدا جدا باستخدامه يعني الواحد منهن كان يرجع بوجبة كاملة على البيت من العصافير وخود على قلي يا معلم مع قرص بندورة بلدية حامضة يعني قب باطها من السمن والشحرور من عود المطيط
وأنا اول عصفور صيدتو وكان الوحيد كنت صف خامس وعملنا عليه وليمة أنا وابن عمي وكان طيب كتير
كنا ندور الأراضي والكروم لاحقين شي رف دوري او سمن او شحرونة(شحرورة)
واحبانا نلعب لعب جماعي انو نتسابق نحط تنكة او عصاية ونصوب عليها ومين بيصيب اكتر
واحيانا كنا نلحق ابو بريص والحرادين وسبحان الله كنا نصيد كميات كبيرة طبعا لانو ما بتتاكل
ايههههههه على هديك الأيام
هلق انقرضت هالشغلة
وعلى فكرة 80% من صيادين هالايام اذا مو كلهن كانو ماهرين جدا بعود المطيط فهو الاساس
.
.
مع تحياتي
م . علي مصطفى سمعول
راحات ايام زمان